बेरुजु फर्स्यौटमा नेपाल प्रहरी सर्वोत्कृष्ट

Posted on: January 02, 2020 | views: 97 सुशासन संवाददाता

काठमाडौं,  पुस १७ । बेरुजु फर्स्यौटमा नेपाल प्रहरी यो बर्षपनि सर्वोत्कृष्ट हुन सफल भएको छ । गृह मन्त्रालय र अन्तर्गतका निकायहरुमध्ये बेरुजु फर्स्यौट मापनको वर्गीकरणमा  आर्थिक वर्ष २०७४-०७५ सम्मको बेरुजुलाई ८८.५० प्रतिशत फर्स्यौट गराई बेरुजु फर्स्यौट प्रगतिमा नेपाल प्रहरी सर्वोत्कृष्ट स्थान हासिल गर्न सफल भएको हो ।

गृह मन्त्रालयमा बिहीबार आयोजित कार्यक्रममा गृहमन्त्री राम बहादुर थापा ‘बादल’ ले प्रहरी महानिरीक्षक सर्वेन्द्र खनाललाई नेपाल प्रहरीले सर्वोत्कृष्ट स्थान हासिल गरेकोमा नगद १० हजार रुपैयाँ पुरस्कार सहित प्रंशासापत्र प्रदान गरे ।

प्रहरी प्रधान कार्यालय र अन्तर्गतका कार्यालयहरुको  आर्थिक वर्ष २०७४-०७५ सम्मको बाँकी बेरुजु रकममध्ये ८८.५० प्रतिशत फर्छ्‍यौट गरी बेरुजु फर्स्यौट मुल्याङ्कन तथा अनुगमन समितिको सिफारिस बमोजिम नेपाल सरकार (माननीय मन्त्रीस्तर) को निर्णय अनुसार बेरुजु फर्स्यौटटको प्रगतिमा नेपाल प्रहरी सर्वोत्कृष्ट स्थान प्राप्त गर्न सफल भएको हो ।

आगामी दिनमा समेत यसरी नै निर्दिष्ट लक्ष्य अनुसार बेरुजु फर्स्यौट कार्यमा नेपाल प्रहरीको लगनशिलता एवं सक्रियताको अपेक्षा गरिएको प्रशंसापत्रमा उल्लेख गरिएको छ । बेरुजु फर्स्यौट मापनको वर्गीकरणमा गत आर्थिक वर्ष मा समेत नेपाल प्रहरी सर्वोत्कृष्ट स्थान हासिल गर्न सफल भएको थियो ।


Share your thoughts!